एफबीवर, व्हॉटसअॅपवर स्टेटस अपडेट करताय...फोटो टाकताय. पण तुमचं हे अति सोशल अपडेटिंग तुमच्या सोशल नेटवर्किंगवर नजर ठेवून असलेल्या स्मार्ट चोरांनाही अपडेट करतं हे तुम्हाला माहितीय का?
'ऑन गोवा टूर विथ फॅमिली' असं विमानतळावरील चेक इन पडल्यानंतर काही तासातच त्यांच्या घरी चोरी झाली. चोरांना अटक झाल्यानंतर, कॉमन फ्रेंडच्या अॅक्टिव्हीटीमुळे हे घर रिकामी असल्याचं चोरांना समजल्याचं समोर आलं.
'वाढदिवसाला हिऱ्याची अंगठी मिळालीय, उद्या शाळेत घालून येईन.' हे स्टेटस एका मुलीनं एफबीवर टाकलं होतं. दुसऱ्याच दिवशी शाळेतून घरी येताना तिच्या फेसबुक फ्रेंडनं अंगठी लुटून नेली. आजीला दागिने मोजण्यात ती मदत करत होती. दागिन्यांचा फोटो तिनं फेसबुकवर 'फिलींग रिच'च्या कॅप्शनसहीत अपलोड केला. आणि त्याच रात्री तिच्या आजीच्या घरी चोरी झाली. एका जाहीर कार्यक्रमाला अमुक ठिकाणी जातेय हे तिच्या फेसबुक स्टेटसवरून कळलं. चोरांनी कार्यक्रमाच्या ठिकाणी फोन करून त्याची नेमकी वेळ जाणून घेतली आणि घरी कुणी नसताना वेळ साधून डल्ला मारला.
दोन आठवडे लंडनला मुलाकडे जातेय असं सांगणाऱ्या स्टेटस अपडेटचा फायदा घेत चोरट्यांनी घर साफ केलं.
आपल्याकडे आणि परदेशात घडलेली ही उदाहरणं खूपच बोलकी आहेत. यामुळे तरी सोशली अतिअॅक्टिव्ह असणाऱ्यांचे डोळे खाडकन उघडतील असं वाटतं. सध्या सुट्ट्यांचा मोसम आहे. सुट्टीसाठी बाहेरगावी जाताना, कामासाठी दौऱ्यावर जात असताना अनेकांना विमानतळ, रेल्वे स्टेशनच्या नावाने फेसबुकवर चेक इन करण्याची सवय असते. मात्र हीच गोष्ट त्यांच्यासाठी घातक ठरु लागलीय. या पोस्टच्या माध्यमातून आपण चोरांना क्लू देत असल्याचं अनेकांच्या लक्षातच येत नाही.
खास करून उन्हाळ्यामध्ये शाळांना सुट्ट्या असताना असे चेकइन्स, फोटो अपलोड करत गावाकडची मज्जा सोशल करणारे अनेकजण फेसबुकवर दिसतात. त्यामुळेच उन्हाळ्यात अशी डिजिटल हेरगिरी करून चोऱ्या होण्याचे प्रकार वाढलेत असं सायबरतज्ज्ञ सांगतात. म्हणून उगाचच ट्रिपच्या ठिकाणाहून चेक इन करणं, फोटो अपडेट करणं शक्यतो टाळावं. तर हे स्मार्ट चोर तुमच्या घरांपासून लांब राहतील, असं 'रिस्पॉन्सीबल नेटिझम'चे उन्मेश जोशी यांनी सांगितलं.
स्टेटस अपडेट टाळा
आजकालचे चोर खरोखरच स्मार्ट झाले आहेत. तुमच्या सोशल प्रोफाइलवर त्यांची नजर आहे हे लक्षात ठेवा. त्यामुळे पर्यटनस्थळी असताना तिथून फोटो आणि स्टेटस अपडेट करणं टाळा. घरी आल्यावर निवांतपणे ते करता येईल. तुम्ही घरी नसताना तुमचं सोशल अकाऊंट चोरांसाठी आमंत्रण ठरेल अशी कोणतीही पोस्ट करणं टाळा.
-अॅड. प्रशांत माळी, सायबर कायदे आणि सुरक्षातज्ज्ञ
कोणत्याही टिप्पण्या नाहीत:
टिप्पणी पोस्ट करा